ਛਾਂ ਪਲੋਸੇ ਟੁੱਟਿਆ ਪੱਤਾ, ਮੈਂ ਪਲੋਸਾਂ ਰਿਸ਼ਤੇ|
ਆਪ ਬੁਲਾਏ ਨੇਰ੍ਹੀ ਝੱਖੜ, ਦੋਸ਼ ਲਗਾਵਾਂ ਕਿਸ'ਤੇ ?
ਦਿਲ ਦਾ ਇੰਜਣ ਕੂਕਾਂ ਮਰੇ, ਸਾਹਾਂ ਦੇ ਡੱਬੇ ਖਿੱਚਦਾ
ਬੋਝ ਕਰਮਾਂ ਦੇ ਸਭ ਥਾਂ ਮੱਲੀ, ਤੇਰੀ ਵਫਾ ਬਿਠਾਵਾਂ ਕਿਸ'ਤੇ ?
ਮਾਰ ਕੇ ਧੱਕੇ ਕੱਢੀ ਗਰੀਬੀ, ਸੌਂਕਣ ਮਾਇਆ ਵਿਆਹੀ
ਟੇਢੀ ਤੱਕਣੀ ਤਕੇ ਬਿਗਾਨੇ, ਮਾਣ ਕਰਾਂ ਕੀ ਇਸ'ਤੇ ?
ਆਪ ਤੋਂ ਭੱਜ ਕੇ ਭੀੜ 'ਚ ਵੜਿਆ, ਭੀੜ 'ਚ ਆਪਾ ਲੱਭਾਂ
ਸ਼ੀਸ਼ੇ ਚੁੱਕੀ ਫਿਰੇ ਇਹ ਖਲ੍ਕਤ, ਯਕੀਨ ਕਰਾਂ ਮੈਂ ਕਿਸ'ਤੇ ?
ਭਰਿਆ ਧੂਆਂ ਹਓਮੇ ਵਾਲਾ, ਮਨ ਮੰਦਰ ਸਾਹ ਘੁੱਟਿਆ
ਖਿੱਚ ਲੈ ਚੱਲੇ ਰੂਹ ਨੂੰ ਮੇਰੀ, ਰਾਜ਼ੀ ਰਹਿਣ ਫਰਿਸ਼ਤੇ......
